इनरुवा । सशस्त्र प्रहरी बल नेपाल नम्बर ४ गण हेड क्वाटर सुनसरीले भारतबाट अबैद्य रुपमा तस्करी गरेर भित्र्याउँदै गरेको २३ लाख रुपैयाभन्दा बढीको सामान नियन्त्रण लिएको छ ।
प्रस्ताबित सीमा सुरक्षा गुल्म हरीपुर, प्रस्तावित सीमा सुरक्षा गुल्म कप्तानगंज बिओपि श्रीपुर, बिओपी. लौकही, साहेबगंज र अमडुवाबाट खटि गएको टोलिले भारतबाट अवैध रुपमा नेपालतर्फ ल्याउँदै गरेको र नेपालबाट भारततर्फ लैजादै गरेको अवस्थामा सुनसरी जिल्लाको बिभिन्न स्थानहरुबाट लत्ता कपडा, सुर्ती, किराना सामान प्याज, खसी, जल्कपुर माछा र मदिरा नियन्त्रणमा लिई आवश्यक कारवाहीको लागी सुनसरी भन्सार कार्यालय सेतुबन्ध सुनसरीमा बुझाईएको हो ।
जसमा विभिन्न सामग्रीसहित एउटा म्याजिक भ्यान पनि रहेको छ । नियन्त्रणमा लिएका सामग्री मध्ये १२० किलो प्रतिबन्धित मुङ्ग्री माछा र दुई लाख रुपैया बढीको पटका भने सशस्त्र प्रहरीले पत्रकार र स्थानीयको रोहवरमा नष्ट गरेको छ ।
नम्बर ४ गणका डिएसपी प्रेम सिग्देलका अनुसार पटाकाजन्य वस्तु सशस्त्रको टोलीले भोक्राहा नरसिंह गाउँपालिका वडा नम्बर ८ को घिर्नी पुल नजिक खेतबाट फेला पारेको हो । २ लाख २४ हजार मूल्य बराबरको पटाकाजन्य पदार्थ वेवारिसे अवस्थामा भेटिएको सामग्रीलाई नष्ट गरेको हो ।
गण हेड क्वाटर सुनसरीले चोरी तस्करीको सूचना भए जानकारी दिन सर्वसाधारण समक्ष अनुरोध समेत गरेको छ । उसले नाकामा हुने कानुन विपरितका कार्यलाई सशस्त्रले सूक्ष्म रुपमा नियाल्दै आएको जनाएको छ ।
