” बा…आज तिम्रो सम्झना आइरहेछ “

सागर तिम्सिना
बा,,
आज तिम्रो मुख हेर्ने दिन
मलाई तिम्रो सम्झना आइरहेछ।
तिमिसंग बिताएका हरेक पलले
आज मलाई सताइरहेछ।

हामिलाई बाच्न योग्य बनाएर
तिमी शुन्यमा बिलायौ,
हामिलाई संसार देखाएर
तिमिले संसार छाडिदियौ।

तिमिले रत्तिभर कमि नराखी
हाम्रो पालनपोषण गर्यौ
विपन्नताले निहुरिएको परिवारलाई
स्वाभिमानी भएर बाच्न सिकायौ,
अरुलाई ठगेर हाम्रो पढाई खर्च जुटाएनौ
अरुसंग झूटो बोलेर हामिलाई खुशी बनाएनौ,
हामी बिरामी हुदा जडीबुटीले काम चलायौ
ऋण काढेर उपचार गराएनौ।
आफ्नै मेहनतको पसिना सिन्चित गरेर
जे-जस्तो उब्जनी भयो
त्यसैको मिठो गासले हामिलाई हुर्कायौ।

बा,,
तिमी साह्रै सोझा थियौ
अरुले जे-जे भन्छन,तिमी मान्दै गयौ
अरुको दुख देख्न नसकेर
आफ्नो सुख बाडने गर्थ्यौ।
तर,आज हामिले दुख पाउँदा
कसैले हामिलाई सान्तवना दिएनन
कसैले हामिलाई एकशब्द बोलाएनन।

तिमी भन्ने गर्थ्यौ
अरुलाई दुख दिएर सम्पत्ति जोडनु पाप हुन्छ
तिम्रै सिद्धान्त पछ्याएर
आज हामी अभाव खाएर धर्म कमाइरहेका छौ,
तिमी कहिल्यै अरुसंग रिसाएनौ
बरु सबै कुरा सहेर बसिदिन्थ्यौ
तिम्रै संस्कार अनुसरण गरेर
हामी अपहेलित हुँदै गएका छौ,
तिमी भन्थ्यौ,अर्काको चित्त दुखाउनु हुदैन
यतिबेला हाम्रै चित्त अरुले दुखाएका छन
हामी विपतमा परेर आश्रय माग्दा
आफन्तले समेत मुख लुकाएका छन।

बा,,
आज तिम्रो मुख हेर्ने दिन
मलाई तिम्रो सम्झना आइरहेछ
तिमिसंग बिताएका हरेक पलले
आज मलाई सताइरहेछ।
तिमी भन्थ्यौ,मान्छेलाई ठग्नु हुदैन
तर,हामिलाई नै ठगेर माथी पुगेकाहरु
तल देखेर हामिलाई नै जिस्काउछन,
तिम्रो आदर्शको अनुयायी बनेर
हामी जहाँ थियौ,रत्तिभर अघि बढन सकेनौ
हामी तल झर्दै गयौ
एक इन्च पनि माथी चढन सकेनौ।

बा,,
तिमिले जसरी संसारलाई बुझ्यौ
संसारले तिमिलाई बुझ्न सकेन
तिमी जीवनभर सत्यको पछि लागीरह्यौ
जीवनभर अरुकै राम्रो सोचिरह्यौ
तर,तिम्रो मृत्युमा
तिम्रा कुनै हितैषीहरु श्रद्धाञ्जली दिन आएनन
कसैले पनि तिम्रो शवमा एक थुगा फूल चढाएनन।

बा,,
आज तिम्रो मुख हेर्ने दिन
मलाई तिम्रो सम्झना आइरहेछ
तिमिसंग बिताएका हरेक पलले
आज मलाई सताइरहेछ।